《讀者投稿》上一篇讀者請教的前因（1）
＊因篇幅長，facebook 限制出唔晒，要分兩個post。
想同大家分享下我嘅故事
(老爺奶奶永不再見)
結婚5年了，一直以來，係6299面前唔敢出聲嘅我，一直只有哋俾說話我聽。再加上我本身驚驚青青又細膽嘅性格，咩都只有死忍。但原來人忍到去極限，就會爆煲，而且一次又一次地被傷害，一直唔敢出聲嘅我，今次當面同99吵到反面，永不再見。
結婚篇：
我老爺奶奶係福建人，好重男輕女，佢哋d仔係寶，人哋d女就係草。
拍拖時，因為少同佢屋企人相處，只知道佢哋講嘢有骨咁，好多嘢覺得少事忍下就算啦。去到同老公開始搞結婚嘢，先覺得哩家人都幾西利，結婚話要女家俾100萬男家做嫁妝，又叫我女家回金器俾男家每個親戚，6299話係佢哋風俗要咁樣。我梗係彩佢都傻啦，哩度係香港，點解我要跟你福建風俗。然後我話我女家無咁多錢，唔結啦。然後99話，唔緊要啦，咁老爺奶奶幫你做埋啦咁。我老公話依家好多福建人都唔會咁樣，佢d親戚都無咁樣，話係佢媽想佢娶個福建妹，又想睇下賺唔賺到我哩筆。 其實結婚所有嘢都係我兩公婆自己出，搞結婚嘢等同於AA, 我有出一半錢。6299只係出酒席錢，係佢哋出，佢哋收。而我女家只拎咗6圍酒席，我父母無收，俾咗我哋兩公婆收。早知6299咁麻煩，當初我一定女家自己擺，果少少錢，到依家99仲講緊欠佢果6圍酒席。
住屋篇：
令我慶幸嘅係，唔洗同6299同住。層樓名義上係我老公買黎日後結婚用，但係層樓原來落咗99名，我老公做擔保。99話，當租俾我哋，我哋當每月交租俾佢供。然後話，遲d結婚生咗小朋友後，可以轉翻名。咁最後搬咗入去啦，住咗幾年後我哋要求轉翻名俾我老公，99唔肯，話如果要轉名，要我女家俾200萬佢，但其實佢層樓只出咗百零萬首期，而且大部份d錢係我老公佔嘅首期黎，老公出黎做嘢10幾年，一出糧成份糧俾晒佢媽，自己無草錢，有數得計。99滿口都係大話，連裝修家俬話幫老公草果d, 最後都自己食埋。因為知道99無信用，我哋先至覺得要轉翻名，其實雖然我有份供，我唔計較有無我名，但起碼要有我老公名，而唔咪幫人供完30年，層樓都唔咪我老公。後尾我哋話搬出去住，層樓以後佢哋自己供翻又好，租俾人又好，我老公話層樓當送俾佢父母當養育之恩，我哋寧願兩公婆重新慢慢草過。老公搞咗一大輪，99又肯轉名，最後我同老公出咗20萬轉名翻黎。
拜山篇：
啱啱有咗BB, 99都堅持要我翻大陸拜山，仲要我跪埋係山頭又跪又拜。然後翻到香港，去做產檢時發現肚入面BB無咗心跳，醫生建議盡快做手術，後尾第二朝已經安排去做。我做完手術出院，99就wechat黎鬧，無一句關心不特止，話我係賤女人，搶走佢個仔，話佢養大個仔由細到大付出幾多，養大佢用咗幾多錢等等……佢衰到仲要打電話俾我老豆，話我父母無家教，又係講對我幾不滿果d。其實一直以來，你男家幾刻薄我，我都唔想俾我父母知，起碼想俾我父母覺得個女嫁得好，過得開開心心，唔想佢哋擔心，但點解你做人99可以衰到咁?
後尾嬲咗佢哋1年無見。去到大仔就黎出世，因為自己衰心軟又俾面我老公，娘家又勸我原諒佢哋，老公又叫俾機會佢父母去做好，因為我老公其實都幾孝順，我又唔想佢難做，所以開始同佢屋企人來往翻。其實生咗大仔，99都一樣對我差，連坐月我老公主動叫99煲d野俾我食，99都發晒顛咁鬧唔煲。其實煲唔煲好少事，但果刻我開始明白，原來孫係佢哋孫，我始終都係外人，無當我係心抱咁對待。果時開始，我就幫自己做好思想工作，我唔奢望佢哋對我好，對我小朋友好就夠了。雖然6299住得好近，住對面，但從來無照顧過我哋頭家1日，1餐飯。其實唔計較咁多，我寧願少見少d問題，然後平平淡淡咁又過咗幾年……
二胎篇：
因為老公一直知道佢父母好恨湊孫，而第一胎時因為大家鬧翻咗，所以當時大仔係叫我父母幫手湊，無俾6299湊。咁第二胎我老公就叫我俾多一次機會佢父母去做好。因為流產手術果次同埋上胎，佢屋企人都無做好，所以哩胎，我老公叫我俾個機會，加上我父母哩胎唔湊又勸我試下俾佢哋湊，於是惡夢又開始了……
＃我的極品四大長老
Search